Desse "glimta" har me plukka ut or møtebøkene og til dels frå lagsavisa "Ungskogen".
1918
17/2: Skipingsmøte
Ikkje referat frå det første møtet, men lagsavisa "Ungskogen" fortel eitt år seinare at
skipingsmøte vart halde på meierisalen på Håfoss. Vossingen Olav Kvarekvål, som
arbeidde i anleggstida i Litledalen, vart vald til formann i ungdomslaget "Fram".
20/4: Det første ordskiftet
Det første ordskiftet i laget: "Hvorfor reiser ungdommen fra landet ?" (landsbygda ?)
Olav Kvarekvål har ikkje høve til å vera formann lenger, og nestformannen, Tjerand
Silde, vert vald til ny formann.
5/5: 12 kr til ungdomshus
Halvard Fjøsne held foredrag om Ivar Aasen. Det hadde kome inn 12 kroner til
bygging av ungdomshus.
1919
11/1: Forbod mot rusdrikk ?
På dette møtet var det eit ordskifte om me burde ha eit forbod mot rusdrikk i Noreg.
Desse vart valde til å finna tomt til ungdomshus: Thor Gjerde, Johannes Kambo og
Johannes Tyssedalstveit.
8/2: Problem med folkeviseleik i skulehuset
Første "korgaleik" omtala i "Ungskogen". Maria Tyssedalstveit skriv om folkeviseleiken:
"Leiken vart det dessverre så lite av. Ingi råd med det, når dei eldre ikkje kan tola det, får
dei unge bita i det sure eplet til dess dei får sitt eige hus og råder seg sjølve".
Tilbod frå Johannes Tyssedalstveit om fri grunn til ungdomshus på utmarksstykket ved
Likskar, 30 meter frå hovudvegen. Det vart ikkje gjort noko vedtak i saka.
15/2: "Ungskogen" har ein stutt notis om skipingsmøtet i u.l. Fram året før. (Det einaste
referat me har frå dette møtet.) Det var få jenter med i starten.
10/3: Mange medlemer
"Ungskogen" opplyser at det er 90 medlemer i laget, men på møta er det berre 15 - 20.
29/11:Første spelstykket
Det første spelstykket i ungdomslaget , "Åndelige klenodier" vart vist på korgaleik til
inntekt for ungdomshus. Tilskipinga var på Enge skule.
Dei som var med: Ola Uppigard Samson Stalheim
Kona hans Herborg Vik
Bokseljar Pedersen Ingebrigt Haugen
Knut Herman Vik
Tore Olav J. Knutsen
Husmannen Knut Knutsen
Tenestegjenta Torbjørg Gjerde
1920
14/2: Kontakt med ungdomslaget "Daggry" på Børkjenes
"Ungskogen" opplyser at formannen i ungdomslaget på Børkjenes har vore på lagsmøte i
Fram og lese opp. Kontakten mellom desse laga heldt fram, for "Ungskogen" frå 10.
april inneheld ei takk frå formannen i Fram til medlemene for fin framferd under
motorbåtturen til u.l. "Daggry" på Børkjenes.
10/4: Kronerulling til reising av ungdomshus
I "Ungskogen" kvitterer kasseraren, Ole Skjensvold, for 20 kr frå Reinert Madsen
og 5 kr frå Olav Helleland, Skjensvoll.
8/5: Skiping av idrettslag
Diskusjon på lagsmøte om skiping av idrettslag
29/5: Lover for idrettslaget
Lover for idrettslaget vedtekne på lagsmøte. Dette laget eksisterte i 4 år.
Møtereferat frå 24. april 1924 viser at fotballaget er nedlagt, og at kassen - kr 30 - er
overlevert til kasseraren i ungdomslaget.
13/11: Brev frå Etne skulestyre
I "Ungskogen" blir dette brevet frå Etne skulestyre gjengjeve:
"Hvis ungdomslaget melder sig ind i Norigs ungdomslag og holder sig dette lags lover
efterrettelige, er der ingen ting i veien fra skolestyrets side for at skolesalen benyttes".
Maria Tyssedalstveit, som siterer dette brevet i "Ungskogen", skriv vidare at Noregs
Ungdomslag sine lover tillet folkeviseleik, og ho hevdar at no kan dei ikkje nekta leik på lagsmøta.
På denne tida har laget 4000 kr på bankbok.
Maria Tyssedalstveit var den første kvinna som heldt foredrag i ungdomslaget. Ho
tala om kvinnesak, og det kom helsingstelegram til laget i dette høvet.
1922
24/2: Utan møtelokale
Møtereferat nemner at laget måtte innstilla møteverksemda frå 4. november 1921
til 24. februar 1922 fordi skulestyret vedtok å nytta salen på Enge skule til eit 12
vekers framhaldsskulekurs.
29/4: Byggjespørsmålet
Lagsmøte vel denne nemnda til å greia ut byggjespørsmålet: Amund Enge,
W. Børretzen, Tjerand Silde, Arthur Gravelsæter og Herman Vik.
16/12 Lagsmøte vel nemnd til å ordna med tomtekjøp: Ola Sørheim, Amund Fjøsne
og Brita Gjerde.
1923
17/2: Lite dans
Årsmøtet vedtek nye lover (endringar) og husvedtekter.
Vedtektene for huset slo fast at utanom jonsok og 17. mai kunne ein ikkje ha runddans
meir enn to gonger i året. Huset kunne ikkje leigast ut til runddans til andre lag.
(Etter framlegg frå 10 medlemer vedtok årsmøtet 19/2 - 1929 å endra siste setninga
for skyttarlaget som hadde søkt to gonger om å få ha skyttarfest med dans. Endringa
galdt berre for skyttarlaget, og løyve til skyttarfest med dans skulle gjevast av styret
for eitt år om gongen.)
Dette vedtaket vart omgjort av årsmøtet 28/2 - 1934 slik at berre "Fram" kunne nytta
huset til dans, og elles kunne huset berre leigast ut til dans i samband med bryllaup.
3/3 Hordastemna
Formannen i u.l. "Daggry" er til stades på lagsmøte og les opp skriv frå Hordaland
ungdomslag om at Hordastemna 1923 er tenkt lagd til Etne. Møtet vedtok at styra
i "Fram" og "Daggry" skulle ha fellesmøte søndagen etter for å drøfta saka.
Hordastemna 23. og 24. juni 1923
Stemnestaden var Kyrkjedalen på Stødle. Det var ein liten dal - som no delvis er borte -
og som munna ut mot vegen om lag der Victor Børretzen seinare bygde hus. Her vart det bygt ein stor platting med talarstol. Stemnedeltakarane sat då oppetter bakkane inni dalen, vende mot talarstolen og bygda. Me siterer frå programheftet:
Laurdag 23. juni:
kl. 3 em. Foredrag av skulestyrar Brekke
kl. 4 em. Foredrag av skulestyrar Brekke
kl. 7 em. Friluftsfest med talar, musikk, upplesing og ymse anna
Sundag 24. juni:
kl. 11 fm. Messa ved sokneprest Gunnarson (Gundersen)
kl. 4 em. Foredrag av høgskulestyrar J. Naadland
kl. 5 em. Foredrag av rektor Eskeland
kl. 7 em. Spelstykke
Det var Skånevik ungdomslag som viste spelstykket "Til sæters", og dei var svært flinke, vert det fortalt. Vêret var ikkje bra, men likevel var 1.500 menneske til stades. Om kvelden danste dei i løa til Tyssedalstveiten.
Folk som minnest denne stemna, kan fortelja at dei tilreisande overnatta i løene rundt om
i bygda. Det var sjølvsagt lite høy i løene på denne tida av året, så krava til overnatting var ikkje store den gongen.
1924
13/1 Laget låner "boksamling"
Rekneskapen som vert lagd fram på årsmøtet, viser at laget har ein kontantmidel
på 9.800 kr.
Johannes Kambo har fått lånt ein bokkasse på 53 bøker frå Statens boksamling i
Bergen. Laget får ha denne "boksamlinga" i fire månader mot ei leige av 4 kr pr.
mnd. Bokskåpet vert plassert hjå Wilhelm Børretzen.
Wilhelm Børretzen gjekk til vanleg under namnet "Ville" eller "Villen". Han budde den gongen nokså nær Gamleskulen, på Hølen ved Hølabruno, slik at det var kort veg
mellom møtelokalet og boksamlinga.
1925
21/2: Dei som møter i laget, må betala medlemspengar
Rekneskapen på årsmøtet viser at laget no har ein kontantmidel på 10.867,49 kr.
Årsmøtet gjorde vedtak om at dersom einkvan hadde vore med på tre med-
lemsmøte i laget, og framleis var med, skulle dei reknast som medlemer og avkrevjast
medlemspengar.
I året som gjekk, hadde laget 30 medlemer.
3. og 4/4: Basar på Banksalen. Netto-innkoma var 412 kr.
3/5: Kvar skal ungdomshuset stå ?
Lagsmøte drøftar plasseringa av ungdomshuset. Delte meiningar. Desse vart valde
til å finna høveleg hustomt: Tjerand Silde og Torvald Børve.
17/5 Samarbeid med dei kristelege ungdomslaga
Sørbygdens kristelige ungdomslag og Nordbygdens kristelige ungdomslag og u.l.
Fram gjekk saman om 17. mai-programmet på Enge skule. Talarar var: Olav
Heggebø, lærar Folkedal og M. Mæhle. Førsunds songkor song. Til slutt var det
kappspringing for born og vaksne, med premieutdeling etterpå. Det var fint vêr og
god stemning.
5/12: Lagsmøte vedtek med 26 mot 3 røyster å kjøpa tomt hjå Ola Silda.
1926
23/1: Byggjenemnd for ungdomshuset
Rekneskapen som vert lagd fram på årsmøtet viser at laget si eige har auka til
12.126,25 kr.
Årsmøtet valde denne byggjenemnda for ungdomshuset: Johannes Kambo,
Herman Vik, Wilhelm Børretzen, Ola Sørheim, Torvald Børve, Amund Enge
og Tjerand Halstensgaard.
6/2: Lagsmøte vedtek, etter framlegg frå byggjenemnda, å byggja eit hus på
8 x 14,5 meter. (32 mot 4 røyster.)
Byggjenemnda fekk løyve til å nytta dei midlane dei trong til å få utarbeidd
teikningar og tilbod på arbeidet.
4/6: Lagsmøtevedtak om å starta bygginga av ungdomshuset.
23/10: Lagsmøte vel nemnd til å stå for innviingsfesten av "Ljoshall":
Johannes Kambo (form.), Amund Enge d.e., Herman Vik, Ola Sørheim, Gjerde,
Tjerand Halstensgaard, Torvald Børve, Erik Moe, Maria Tyssedalstveit, Synnøve
Sørheim, Brita Gjerde, Barbro Børretzen, Gina Molland, Ingeborg Sæbøe, Elise
Hamre, Hilda Gravelsæter, Marie Skare, Cecilie Dyngebakken og Ingeborg Børve.
20/11: Siste møtet på Enge skule
"Fram" held sitt siste møte på Enge skule (dvs. Gamleskulen mellom elva og Hauga-
bekken). Formannen sender takkeskriv til skulestyret for at laget har fått halde til
på skulen.
Styret får fullmakt til å forhandla med kunstmålaren Rudolf Krogh om måling av
sceneteppe. Dagen etter (21/11) har styret gjort avtale med Krogh, og gjer
vedtak om måling av teppe.
5/12: Innviingsfest for "Ljoshall"
Søndag 5. desember vart "Ljoshall", huset åt ungdomslaget "Fram", innvigd med fest.
Festen tok til kl. 4 om ettermiddagen. Vel 300 menneske var til stades. "Ljoshall" var
vakkert pynta med grønt, flagg og lys. Johannes Kambo var feststyrar. Han helsa fest-
lyden og takka ingeniør John Moe som hadde teikna huset, og byggmeister Fosse som
hadde hatt arbeidet. Festtalen vart halden av folkehøgskulestyrar Svello frå Halsnøy.
Emnet var "Ungdomen og ungdomsvener".
Festmaten var rjomegraut og annan god, heimelaga mat. Det var song av songkoret,
musikk ved Martin Grindheim og Sjur Moe, og opplesing ved Torkel Grindheim.
Ordføraren, Øystein Grønstad, og sokneprest Flåtten hadde helsingstalar. Skode-
spelet "Rationelt fjøsstell" vart vist fram av Torvald Børve, Toralf Fosse, Torkel
Grindheim, Synnøve Sørheim og Brita Gjerde. Til slutt var det leik. (Sjå meir utførleg
referat frå denne festen annan stad i dette heftet.)
11/12: Den første dansefesten
Den første dansefesten i laget tok til kl. 20.00 og slutta kl. 4.00. I pausane under-
heldt Gunvald Auestad med song og skrøner.
1927
9/2: Musikklag
Lagsmøte har føre ein søknad om tilskot til musikklag som skal skipast no.
Det vart vedteke å yta 15 kr.
27/2: Vatn i kjellaren
Langt ordskifte på lagsmøte om kva som kunne gjerast for å halda vatnet ute frå
kjellaren i ungdomshuset. Byggjenemnda vart pålagd å ta seg av saka. Eit framlegg
frå formannen om å kjøpa flagg og flaggstong, vart nedstemt då dei fleste tykte laget
hadde så mykje skuld at ein først laut greia den.
13/3: Planting kring "Ljoshall"
Lagsmøte drøftar å planta tre rundt "Ljoshall". Styret vart pålagt å ordna med dette,
og Jørgen Kaland vart vald til å planleggja og utføra arbeidet.
16/10: Den første filmframsyninga i Etne
På lagsmøte opplyser Torvald Børve at Rasmus Breistein kjem med filmen
"Hardangerbruden".
Dette var truleg den første filmframsyninga i Etne.
1929
5/5: Vedtak om å kjøpa orgel
Lagsmøte vedtek å kjøpa orgel. Sjur Moe og Ole H. Moe skal ordna med kjøpet.
1931
11/1: Godt frammøte på årsmøtet. I alt 70 medlemer var til stades.
1933
4/8: Elektrisk ljos i ungdomshuset
Lagsmøte gjer vedtak om å godta eit tilbod frå elektrisitetslaget om å leggja inn elektrisk ljos i "Ljoshall". Det skulle kosta 384 kr.
1935
27/1: Berre etnesbuar får vera medlemer
Årsmøtet gjer vedtak om at berre etnesbuar får vera medlemer i ungdomslaget.
Dette vart gjort fordi "det syner seg at innmelding i laget av utanbygdsbuande aukar på
av den grunn å få vera med på dei samkomor med dans som laget held".
1938
23/1: Årsmøtet gjer vedtak om å utvida "Ljoshall". Desse vart valde til byggjenemnd:
Sjur Moe, Nils Gravelsæter, Jens Gjerde, Torvald Fosse, Martin O. Moe,
Marta Kambo og Borghild Gravelsæter.
1940
27/2: "Ljoshall" blir kornlager
Styret vedtek samrøystes å stetta ein søknad frå Etne Forsyningsnemnd om å få
leiga "Ljoshall" til lokale for kornlager.
"På grunn av dei alvorlege tider me lever i, fann styret det naudsynt å overlata
huset, trass i at det inneber stort sakn for ungdomslaget og ungdomen".
Krigen kom 9. april 1940, møteverksemda stogga og ungdomslaget "låg nede".
1945
9/6: Laget i arbeid igjen
Etter innkalling av den tidlegare nestformannen, Jens Gjerde, vart det halde ekstra- ordinært årsmøte den 9. juni 1945, berre ein månad etter frigjeringa.
Jens Gjerde styrde møtet, som vart startsignalet til å ta oppatt lagsarbeidet, som
hadde lege nede under heile krigen.
Desse vart valde i styret: Sverre Førsund (form.), Edvard A. Moe (nestform.)
og styremedlemene: Ruth Madsgård, Ingebjørg Lindvik, og Kristen Gravelsæter.
1946
27/11: Ungdomslaget driv folkebad saman med idrettslaget
I ekstraordinært årsmøte vart det etter framlegg frå ordføraren i Etne vedteke å
overta badebrakka i Engeleiren vederlagsfritt saman med idrettslaget. Føremålet
var å driva folkebad.
Badebrakka var ein "etterlatenskap" etter tyskarane. Det viste seg å bli nødvendig
med større påkostnader enn ein hadde rekna med. Dessutan svikta publikum.
Dei to laga søkte difor om kommunen kunne overta badet som no var sett i god
stand.
Først 21/2 - 1952 vedtok kommunestyret å overta badet for 15.000 kr slik
at dei to laga fekk dekka den gjelda dei hadde sett seg i for å setja badet i stand.
1948
17/2: 30-års-fest
Ungdomslaget hadde 30-års-fest på "Ljoshall" 17. februar. Olav Vik las prolog
og formannen i Hordaland ungdomslag heldt festtalen. Torkel Grindheim las opp
eit oversyn over ungdomslaget sitt arbeid i desse 30 åra. Det var elles talar av
Gunvald Auestad, Sverre Tesdal, Amund Fjøsne, Johannes Kambo, sokne-
prest Huseklepp og ordførar Trygve Vinje. (Sjå elles særskilt referat annan stad
i dette heftet.)
1950
17/1: "Etne-Amatøren 1950"
Styret gjer framlegg om at laget startar teatergruppe. Dette førte til at "Etne-
Amatøren 1950" vart skipa, og dei hadde dei første kabaret-framsyningane
sine 25. og 26. februar 1950.
Overskotet - 1000 kr - gjekk til bygging av gamleheim.
I åra som følgde var denne teatergruppa særleg aktiv, og hadde mange framsyningar
- ikkje berre i Etne - men i Bergen og Hordaland elles, og i Ryfylke.
19/5: Eigen kino ?
Styret gjer vedtak om å ta opp arbeidet for at bygda får eigen kino, driven av
ungdomslaget.
1951
27/9: Kveldskurs
Det vart vedteke å setja i gang eit 20 vekers kveldskurs i engelsk, samfunnslære
og rekneskapsføring. Kurset kom i gang 1. november med 25 elevar. Martin Vevatne
var lærar.
I same tida skipa laget til eit 3 månaders vevkurs (11 elevar) og eit 7 vekers musikk-
kurs (45 elevar).
14/10: Produksjonsutstilling
Etne Bondelag og u.l. "Fram" skipar til ei produksjonsutstilling. 2000 menneske
såg utstillinga. Av nettoinntekta gjekk 1.500 kr til eit utstillingsfond og 700 kr
til gamleheimen.
1952
19/1: Laget startar eigen kino
Årsmøtet gjer vedtak om at laget skal starta eigen kino.
1953
8/2: Hjelp til ofra etter flaumkatastrofen i Nederland
Ungdomslaget set i gang lynaksjon for å hjelpa ofra etter flaumkatastrofen i
Nederland. På ei veke kom det inn 6.024,58 kr. Pengane vart sende til
Norges Røde Kors.
16/8: "Ljoshall kino" har opningsframsyning
"Ljoshall kino" hadde opningsframsyning laurdag 16. august 1953. Laget sine
æresmedlemer, tidlegare formenn og kommunestyret var innbedne. Medlemene i
ungdomslaget hadde fritt tilgjenge til denne framsyninga.
I samband med tiltaket lånte laget 28.000 kr i Haugesund Sparebank. Kostnaden
for kinoanlegget var 15.229,53 kr. Resten av pengane vart nytta til vøling av
"Ljoshall"
Ottar Klokkerstuen vart tilsett som kinostyrar.
1955
7/7: Utviding av "Ljoshall" ?
Saman med alle tillitsvalde drøftar styret spørsmålet om å utvida "Ljoshall".
1956
8/2: Nybygg - samfunnshus ?
Langt ordskifte på årsmøtet der mange tala varmt for at ungdomslaget må gå saman
med andre lag og byggja samfunnshus.
Årsmøtet gjer vedtak om å få utarbeidd planar for nybygg.
9/6 og Hordastemna i Etne
10/6: Ungdomslaget "Fram" står som tilskipar av den 60. Hordastemna, laurdag 9.
og søndag 10. juni 1956.
Formann i stemnenemnda var Lars Nygård. Stemneplass vart leigd hjå Edv. Tjelmeland på Sæbø, der det vart bygt ein stor platting. 5-6000 menneske var til stades under
stemna, som vart halden i fint vêr.
1963
27/8: Lagsarbeidet har lege nede fleire år
Lagsarbeidet har no lege nede i lang tid. Kinostyret er det einaste valde styret som
er att av tidlegare valde tillitsmenn.
Sidan det er problem med oppvarminga av "Ljoshall", gjer kinostyret vedtak om å
kjøpa inn oljefyringsanlegg. Eit tilbod frå Vestenfjeldske Oljeselskap Nor på 10.320 kr
vart godteke.
Kinostyret gjer samstundes vedtak om å gjera opptak til å få laget på fote igjen.
10/12: Nyskipingsmøte vart halde for å få laget i arbeid igjen.
1964
9/7: Skulen leiger "Ljoshall" til gymnastikksal
Styret vedtek å leggja nytt golv i "Ljoshall", for huset skal leigast ut til gymnastikk-
sal. Arbeidet skal gjerast på dugnad. Leiga vart sett til 5.500 kr pr. skuleår. Straum
og reinhald er medrekna i summen.
3/9: Styret gjer vedtak om å kjøpa inn koppar og fat til ungdomshuset, og nye songbøker.
1965
7/10: Dårleg stell med bestikk i "Ljoshall"
Referat frå årsmøtet: "Det er forresten dårleg stell med bestikk. Alt Liv Frøkdal hadde
å hjelpa seg med var ein ljå og ei skei".
1967
8/4: Haugtussa-kveld
Laget skipar til ein Haugtussa-kveld saman med Etne mållag.
Det er skodespelarinna Anne Gullestad som står for programmet. Inntekta går til
framtidig nynorsk teater i Bergen.
1968
8/2: Kosekveld for tenåringar
Første kosekveld for tenåringar. Lagsavis (Ungskogen) v/Anna Torhild Førsund,
Allsong, Sketsj v/Toril Børretzen og Terje Hermansen, Dikt v/Anna Torhild Børret-
zen, Dans v/Fool Crabs
17/2: 50-års jubileumsfest
Laurdag 17. februar 1968 - på dagen 50 år etter at laget vart skipa - hadde u.l.
"Fram" sin jubileumsfest. Petra Fjøsne hadde skrive prolog til festen, og tidlegare formann i Hordaland ungdomslag, Harald Bolstad, heldt festtalen. Æresmedlemer og tidlegare formenn var særskilt innbedne. (Sjå særskilt referat annan stad i dette
heftet.)
1969
27/2: Vedtak på årsmøtet: Husleiga vert sett opp frå 75 kr til 100 kr. Kinobillettane stig
frå 3 kr til kr 3,50 for vaksne og frå 1,25 kr til 1,75 kr for born.
11/8: Låner 25 000 kr i Etne Sparebank
Ekstraordinært årsmøte godkjenner opptak av eit pantelån på 25.000 kr i Etne Spare-
bank. Banken tek pant i ungdomslaget sin eigedom "Siljord" av Gjerde, gnr. 9/bnr. 26.
Pengane skal brukast til utbetring av "Ljoshall".
1971
4/3: Hærverk på "Ljoshall"
Årsmeldinga frå 1970/71 fortel om stort hærverk på "Ljoshall", med m.a. knuste
glasruter. Pianoet har og fått hard medfart.
1973 Kinobesøket går ned
28/2: Det går fram av årsmeldinga at kinobesøket har gått ned. Det er ein tendens over heile
landet der filmane vert framsynte i gamle lokale. Medlemspengane i laget er no 20 kr.
1974
19/2: Årsmeldinga viser at driftsoverskotet på kinoen er 2.632,12 kr. Pengane vert brukte
til kjøp av fleire omnar i "Ljoshall".
29. - 31. mars hadde Hordaland Ungdomslag årsmøtet sitt i Etne.
1975
18/2: På årsmøtet i u.l. "Fram" kom det framlegg om at medlemene skulle stilla som gratis
vakter på kinoen pga. bråk under framsyningane.
1977
8/2: Laget kjøper andelar i A/L Etne Samfunnshus
På årsmøtet takkar Ottar Klokkerstuen av som kinostyrar, - eit verv han har vørdsla
på ein framifrå måte i 24 år.
Vedtak om at u.l. "Fram" kjøper 51 andelar i A/L Etne Samfunnshus.
Ny lagsfane er under arbeid og skal vera ferdig til 17. mai.
1979
6/2: Barnelaget "Grolls"
Årsmeldinga fortel at barnelaget "Grolls" starta opp hausten 1978. Om lag 30 born
er med på leik (dans), song, høgtlesing og dramatisering.
Diskoteket har bra besøk med 40 - 60 ungdomar kvar fredagskveld. Karsten Lunde
har lagt ned eit stort arbeid for denne ungdomsgruppa.
15/9: Brukte kinostolar frå Stavanger
Det kom tilbod frå Folketeateret i Stavanger om å få overta 400 kinostolar gratis.
Endre Tjelmeland saman med ein liten dugnadsgjeng ordna opp med lasting og tran-
sport. Omstoppinga vart gjort på dugnad.
1980
12/1: Fest for Olav Vik
Olav Vik fylte 70 år, og mållaget og ungdomslaget gjekk saman om å skipa til ein
fest for han i dette høvet. Ivar Orgland var festtalar. Salen var stappfull. Her var mykje
god allsong og godt program elles. Middag, kaker og kaffi, og leik og dans til slutt.
Det var elles godt å sjå at mange som elles ikkje gjekk i ungdomslaget fekk oppleva
det beste me har av festkultur i bygda vår.
12/2: Ny kinosal frå 10. mai. Forsvaret vil leiga "Ljoshall"
Årsmøtet drøftar eit tilbod frå forsvaret om å leiga "Ljoshall". Dei nye lovene for laget
vert vedtekne. Diskotekkveldane er no flytta til Samfunnshuset. Kinoen skal òg flyttast
til Samfunnshuset. Alt skal vera klart i den nye kinosalen til 10. mai.
17/3: Siste møtet på "Ljoshall"
Omframt årsmøte på "Ljoshall" gjer avtale mellom "Ljoshall kino" og Etne
Samfunnshus. Styret får fullmakt til å ta opp eit lån i Etne Sparebank på 200.00 kr
til kjøp av filmutstyr.
11/5: Første kinoframsyning i den nye kinosalen
Kinostolane vart overrekte som gåve til Etne Samfunnshus.
1981
10/2: Første årsmøte på samfunnshuset
Årsmeldinga fortel at Olaus Drengsti, Jon Grønstad og Endre Tjelmeland var krum-
tappar i omstoppinga av kinostolane året før. Til saman 600 dugnadstimar gjekk med
til dette arbeidet. Om lag 80 ungdomar møter på diskotekkveldane, og om lag 40
ungar er med i barnelaget. Visegruppa, med Jimmy Næs som leiar, har starta opp.
Landsstemna i Noregs Ungdomslag skal haldast i Haugesund til sommaren. Med-
lemene i u.l. "Fram" vert bedne om å hjelpa til med ymse dugnadsarbeid i samband
med stemna.
Vidare kan me nemna frå årsmeldinga: Bunadsmøte med Olga Breivik og konsertar
med Cornelis Vreeswijk og Jan Eggum, og "Lus i rus"-revy.
Bygdefest med Jon Eikemo - to førestillingar - til saman 900 menneske samla i kino-
sal og festsal. Haugesunds Avis og musikklaget var med på denne tilskipinga.
1983
8/2: Årsmeldinga for 1982 fortel m.a. at laget er med i Etnemarknaden, og det har vore
arbeidskrevjande. Elles har laget stått for innsamling av klede til Polen, og ein inn-
samlingsaksjon (pengar) til Nicaragua.
22. - Dansarar frå Orknøyane
24.juni: Ved jonsoktider hadde me ei gruppe dansarar og spelemenn frå Orknøyane på vitjing.
1984 Fylkesstemna for born
1. - 3. juni: U.l. "Fram" står som tilskipar av fylkesstemna for born. Stemnestaden var
Samfunnshuset, skulen og idrettsanlegget.
1985 Dolbyanlegg til kinoen
4/6: Omframt årsmøte gjer vedtak om å kjøpa inn eit dolbyanlegg til kinoen for 168000 kr.
Etne Kino får då eit musikkanlegg som er fullt på høgd med dei større kinoane.
1987
august: Teaternemnda gjer eit framifrå arbeid med "Amerikafeber" (av Johannes Heggland),
som vart framført på utescenen under Etnemarknaden.
1988
Ungdomslaget arrangerer for andre gong fylkesstemna for born.
1990 Eit godt arbeidsår i laget
Årsmeldinga (19/2 - 91) fortel om eit godt arbeidsår i laget: U.l. "Fram" har no 138 medlemer (74 vaksne og 64 born).
12/1: Saman med musikklaget og mållaget skipa ungdomslaget til ein "Olav Vik-kveld" på 80-års-dagen hans. Revygruppa framførde ved opplesing, song og spel noko
av det beste Olav Vik har skrive. Det vart ei stor oppleving både for publikum og
forfattaren. Hans kommentar etterpå: "Å, du veit eg hadde aldri trudd det skulle bli
så fint".
Etne Kino har òg hatt eit godt år. Gjennom året er det selt i alt 20.877 billettar. I 236 framsyningar har kinoen vist 150 filmar. På éin "kinodag 1990" vart det vist 7 filmar og selt 1405 billettar. Resultatet var så godt at Etne Kino vart utnemnd som "landets beste".
mars: Ungdomsteateret framførde "Kjære landsmenn"
22/7: Musikkanlegget til diskoteket stole. Dei fekk nytt, men det vart stole atter ein gong
29/10 - 92.
august: Leikarringen til BUL i Oslo er ungdomslaget sine gjester under Etnemarknaden.
romjula: Visegruppa har ein framifrå fin konsert
1993 Årsmøtet
9/2: Sitat frå innleiinga i årsmeldinga 1992: "Måndag 27. april skjedde det ufattelege at Annemor ikkje lenger er mellom oss. Annemor sin tragiske bortgang har gjort sterkt inntrykk på oss alle, og det vil ta tid før me klarar å koma oss over tapet. Det Annemor stod for og gjorde for laget, er det vanskeleg å setja ord på. I ei årsmelding som denne vil me minnast henne med varme og takk".
9/10: Jubileumsfest
Ungdomslaget "Fram" hadde 75-års-festen sin på Samfunnshuset laurdag 9. oktober.
Jon Eikemo med "Den nye kapellanen" samla mykje folk. Ottar Vanvik var festleiar.
Gamle formenn/leiarar og æresmedlemer var særskilt innbedne.